22 integrantes da “Sociedade Internacional Internacional de Xeoloxía e Minería (Sigmadot) para o Desenvolvemento e Xestión do Territorio” provenientes de lugares variados como Cataluña, Valencia, Madrid e Galicia visitaron o Centro de Interpretación da Lagoa de Antela en Sandiás. Trátase dunha sociedade que ten como obxectivo a ordenación do territorio e o desenvolvemento desde o punto de vista da xeoloxía e a minería ambiental así como a promoción e difusión de actividades relacionadas co mesmo.
Viñan a unha xeira especial coa intención de saborear a xeoloxía da provincia de Ourense e concretamente a Limia, terra rica en historia, arqueoloxía, etnografía e lugares de interese xeolóxico, o motivo máis importante da súa visita. Guiados por Eduardo González Clavijo, xeólogo pola Universidade de Salamanca, profesional autónomo e que realizou traballos de divulgación xeolóxica como o proxecto Silxe, colaborou na Guía Xeolóxica da Reserva da Biosfera Transfronteiriza Gerés-Xurés, na realización dos “Geolodías” e en roteiros para a Cámara Oficial da Minería de Galicia para colexios e institutos, entre outras moitas actividades.
Cando chegaron a Casa da Lagoa, viñan de percorrer o canón do Sil, o val do Miño e estaban tamén moi interesados en coñecer a Lagoa de Antela, especialmente o seu proceso de formación xeolóxica e o proceso de desecación.
A primeira parte, visita guiada baixo a animación de Alex de los Ríos, tivo relación coa exposición permanente na Casa da Lagoa. Visionaron unha proxección sobre a xeografía dos pobos Límicos e a Lagoa de Antela. Pasáronlle revista a diversas lendas sobre a Lagoa asolagada e elementos etnográficos varios como os hipotéticos asentamentos palafíticos e as casas de terróns. Tamén puideron analizar as chamadas economías perdidas da Lagoa (recolección de ovos, caza de aves, comercio de rás e explotación de samesugas con fins médicos). Por último visionaron paneis expositivos sobre as aves e a fauna da primixenia Lagoa.
A segunda parte, visita guiada baixo a animación de Pepe Gándara e de Eduardo González. Púxose énfase nos factores que contribuíron a formar a depresión da Limia e concretamente a formación da Lagoa de Antela. Expúxose sintéticamente un relato interpretativo dos procesos xeomorfológicos, hidrolóxicos e antrópicos (relativos á acción humana) que conformaron a paisaxe da Limia actual. En relación cos factores xeomorfolóxicos, Eduardo González mostrounos tres vídeos moi didácticos en relación co chan da Lagoa de Antela, concretamente a transmisibilidade da area, da arxila e da roca e que explican moi claramente fenómenos como a maior ou menor secura do chan e tamén a maior ou menor contaminación. Pepe Gándara expuxo finalmente as claves do proceso de desecación, especialmente o hipotético de Adriano, o de Toubes no século XIX e con máis detalle o franquista asi como o proceso de concentración parcelaria e as súas consecuencias.
Moi satisfeitos quedamos na Casa da Lagoa e grazas pola vosa visita e o interese pola Comarca da Limia e polo noso Centro de Interpretación. Esperamos transmitir unha visión integral da Lagoa de Antela e que gozásedes coa visita.
Cecais nun futuro próximo estas pezas dispersas poidan volver configurar un novo humidal herdeiro do xa mítico sistema lagunar natural denominado lago Beón.
