O encontro celebrouse no marco da rolda de contactos da Xunta cos concellos galegos para impulsar actuacións estratéxicas e mellorar os servizos públicos
O presidente da Xunta de Galicia, Alfonso Rueda, recibiu o pasado luns 25 de maio ao alcalde de Sandiás, Felipe Traveso acompañado dos concelleiros do goberno local Tito Traveso e Benigno Casares, no marco da rolda de contactos que o Goberno galego mantén cos distintos concellos da comunidade co obxectivo de analizar proxectos susceptibles de contar coa colaboración da Administración autonómica.
Durante a reunión abordáronse diferentes iniciativas orientadas á mellora da calidade de vida da veciñanza e ao reforzo dos servizos públicos municipais. Neste sentido, o rexedor trasladou varias peticións concretas de colaboración activa entre o Concello de Sandiás e a Xunta de Galicia, centradas en actuacións consideradas prioritarias para o municipio.
Segundo se destacou tras o encontro, acadáronse compromisos por parte da Xunta para contribuír á financiación de diversos proxectos estratéxicos. Algunhas destas actuacións poderán executarse ao longo do presente ano, mentres que outras precisarán dunha planificación plurianual debido á súa dimensión e investimento.
Cooperación institucional
A reunión enmárcase na liña de cooperación institucional que a Xunta está a desenvolver cos gobernos locais galegos, co propósito de impulsar investimentos que permitan dinamizar os concellos e mellorar os servizos destinados á cidadanía.
Desde o Concello de Sandiás valorouse positivamente o clima de entendemento e colaboración mantido durante o encontro, subliñando a importancia de contar co apoio da Administración autonómica para avanzar en proxectos estratéxicos de futuro para o municipio.