O Programa Rosalía bota a andar de novo nos concellos de Xunqueira de Ambía, Vilar de Barrio, Rairiz de Veiga e Sandiás. Esta iniciativa, cofinanciada pola Xunta de Galicia e polos fondos europeos, aposta pola formación e o acompañamento integral das mulleres do rural.
Trátase dun programa pensado para ofrecer apoio xurídico, psicolóxico e laboral a través de profesionais especializadas e de recoñecida traxectoria. Ademais do asesoramento personalizado, inclúe accións para o apoderamento persoal, a mellora da saúde mental e física, e espazos formativos onde as participantes poden adquirir ferramentas para avanzar na súa vida persoal e profesional.
Esta segunda edición é tamén un exemplo de colaboración entre catro concellos da comarca da Limia, que unen esforzos para achegar oportunidades a mulleres que, moitas veces, non teñen acceso doado a este tipo de recursos.
