Xogos tradicionais, convivencia e moita diversión marcaron unha xornada que reuniu a nenos, nenas, familias e educadores nun ambiente festivo e participativo.
Sandiás viviu unha tarde inesquecible o pasado venres 29 de maio coa celebración das I Olimpiadas Populares en Familia, unha iniciativa organizada coa colaboración do Concello de Sandiás, o CEIP de Sandiás, o PAI de Sandiás e a ANPA San Nicolás, e aberta tamén á participación doutros nenos e nenas do municipio.
A pesar das altas temperaturas, a cita, desenvolvida entre as 16:30 e as 20:00 horas no Polideportivo de Sandiás, destacou pola elevada participación e polo excelente ambiente que se respirou durante toda a tarde. Nenos, nenas, familias e educadores compartiron unha xornada chea de actividade física, compañeirismo e diversión.
O programa incluíu unha ampla variedade de xogos populares e tradicionais como o tiro da corda, a carreira de sacos, o xogo da chapa, o pano, os bolos, as canicas, a petanca, a carreira de ovos, os circuítos de aros e conos, o paracaídas ou o coñecido xogo do caixón, entre moitos outros.
Ao remate das probas, os participantes gozaron dunha gran merenda colectiva e tivo lugar a entrega de diplomas para todos aqueles nenos e nenas que completaron o circuíto de xogos, recoñecendo así o seu esforzo e participación.
A actividade naceu co obxectivo de fomentar o encontro entre familias, promover os xogos tradicionais e crear espazos de convivencia entre a comunidade educativa e a veciñanza. Un propósito que se cumpriu con éxito nunha xornada na que o máis importante non foi competir, senón xogar xuntos, compartir experiencias e crear recordos en familia.
O éxito desta primeira edición deixa aberta a porta a que as Olimpiadas Populares en Familia se consoliden como unha cita de referencia para as familias de Sandiás, promovendo valores como a participación, a cooperación e a convivencia interxeracional.
