O Patrimonio Cultural Inmaterial maniféstase, entre outros ámbitos, en tradicións e expresións orais; artes do espectáculo; usos sociais e actos festivos; técnicas artesanais tradicionais, etc. Dende a Agrupación Folclórica «Queixumes dos Pinos» presentan os «Encontros sobre Patrimonio Inmaterial no Camiño de Santiago». Estes encontros tradúcense en varias xornadas dedicadas a música, baile, vestimenta galega, etnografía, contos, lendas e tradicións, que terán lugar en diferentes puntos do Camiño de Santiago, neste caso o sábado 1 de outubro no Concello de Sandiás ás 19:00 na Casa de Cultura.
O programa desenvolverase coa benvida ao acto e unha entrevista a Antero Rodríguez Ordoñez. Este artesán e xastre de vestimenta tradicional expoñerá as técnicas de confección dos traxes tradicionais de Galicia. Continuarase cun desfile de traxes tradicionais e roupa de diferentes puntos da comunidade galega acompañado das explicacións por parte do artesán.
Seguirá unha actuación de pandereteiras “Sons do Miño”- José Antonio Viñas, un acto musical con elementos e unha escenografía baseada na etnografía de Galicia. Finalmente, despedirase o acto.
