O PAI acolleu un obradoiro que promoveu a convivencia, a creatividade e a aprendizaxe compartida entre persoas adultas e crianzas
O pasado venres, 5 de xuño, o Punto de Atención á Infancia (PAI) do Concello de Sandiás acolleu o obradoiro “Música e movemento en familia”, unha actividade dirixida por Getsemaní Valenzuela que reuniu familias nun espazo de encontro, expresión e diversión compartida.
A proposta combinou música, literatura infantil e danza para ofrecer unha experiencia participativa na que persoas adultas e crianzas puideron gozar dun tempo de calidade a través do movemento, o xogo e a creatividade. Durante a sesión, as familias exploraron diferentes formas de expresión corporal e musical, creando un ambiente de complicidade e aprendizaxe mutua. A música converteuse así nunha ferramenta para fortalecer os vínculos afectivos entre os máis cativos e as súas familias.
Entre os principais obxectivos da actividade destacou o fortalecemento do vínculo afectivo entre os membros da familia, favorecendo a conexión emocional mediante o contacto, a mirada e o xogo compartido. Ademais, o obradoiro promoveu a corresponsabilidade ofrecendo un espazo de lecer activo no que compartir experiencias significativas.
A iniciativa tamén permitiu ás nais e pais coñecer de primeira man ferramentas e recursos relacionados coa música e o movemento, que poderán aplicar posteriormente no fogar para seguir estimulando o desenvolvemento e a creatividade das crianzas.
Esta actividade converteuse nunha oportunidade para reforzar os lazos familiares e desfrutar dunha experiencia enriquecedora na que a música, os contos e a danza foron os grandes protagonistas. Agradecer a excelente participación das familias e o ambiente de entusiasmo vivido ao longo da xornada. A dirección do Pai de Sandiás agradece a implicación de todas as persoas participantes e reafirma a súa aposta por iniciativas que contribúan ao desenvolvemento integral da infancia a través do xogo, a arte e a expresión corporal.
