O Concello de Sandiás vén de publicar as bases para a contratación de catro peóns e unha persoa coordinadora para o desenvolvemento do proxecto de “Xestión e limpeza de biomasa”, ao abeiro do programa Galicia Suma Talento: Rural Activo, promovido pola Consellería de Emprego, Comercio e Emigración.
Os contratos realizaranse a xornada completa e terán unha duración de nove meses, mediante a modalidade de contrato de mellora da ocupabilidade e inserción laboral.
As persoas interesadas deberán estar inscritas como demandantes de emprego e cumprir os requisitos establecidos nas bases da convocatoria. No caso da praza de coordinador/a, requírese ademais titulación de ciclo superior de FP ou outra titulación superior relacionada co ámbito forestal e do medio natural.
O proceso de selección realizarase entre as persoas remitidas pola oficina de emprego correspondente e valorarase especialmente a pertenza a colectivos con especiais dificultades de inserción laboral, así como as cargas familiares e o nivel de protección por desemprego.
