O Xefe da área Provincial de Turismo de Ourense, Cecilio Santalices, Enrique Pérez, Xefe da área de Calidade de Turismo da Xunta e o director xeral do Instituto para a Calidade Turística Española e a Sustentabilidade (ICTES), Fernando Fraile, abriron o martes 23 de Abril no edificio administrativo da Xunta de Galicia en Ourense as xornadas informativas para presentar o plan do Goberno autonómico para intensificar a calidade e sustentabilidade turística no Camiño de Santiago. É unha das medidas do Plan de Acción de Calidade e Sustentabilidade Turística 2024 da Xunta de Galicia que conta cun investimento global de máis de 500.000 euros.
Consiste o plan en apoiar a implementación e certificación da S de Sustentabilidade Turística e Q de Calidade Turística en distintos recursos de xestión pública (museos, centros de interpretación, espazos naturais…) vinculados co Camiño de Santiago en cada concello.
Con este novo Plan de Acción, o Goberno autonómico pretende avanzar xunto cos concellos na busca da excelencia do destino turístico con cada vez máis establecementos e servizos turísticos certificados pola súa calidade e aposta pola sustentabilidade.
