Cantáronse o Domingo, 4 de xaneiro. Contamos coa presenza da familia do Cdr O Viso , fantásticos animadores comunitarios do centro de desenvolvemento rural.
Nos próximos anos iremos visitando o resto das aldeas do Concello e xa quedaron elexidas as aldeas de As Pegas, O Castro e Cerredelo. Convidamos aos veciñ@s que participen e canten.
Este ano tivenos alta participación. Moitas grazas aos 36 nenos e nenas, pais e nais do Ceip de Sandiás e do PAI (Punto Infantil) para animar e participar da Festa.
No aparcamento do Bar Xestal houbo un ensaio previo e Lucía do Cdr O Viso preparou as letras e a música dos Cantos de Reis e quentamos voces.
Este é o cuarto ano no que intentamos asentar dita tradición nas xoves xeracións.
A acollida foi moi boa e déronnos de aguinaldo doces de reis, chocolate, cafés, bombóns, piruletas, caramelos e ata diñeiro.
O “Cantar os Reis” ou “Aguinaldos” foi sempre unha tradición habitual do Nadal Limiao. Íase a cantar polas casas e grupos de moz@s e nen@s percorrían na parroquia distintas aldeas cantando pezas de literatura popular transmitidas oralmente. A cambio do seu cantar solicitábase un aguinaldo, xeralmente en especie (doces, lambetadas, chourizos…) que despois se consumía nunha foliada.
Recuperar os Cantos de Reis ten moitas ventaxas para a comunidade xa que participa a veciñanza, dáse o encontro interxeracional e foméntase o sentido de pertenza.
