A Casa da Cultura de Sandiás acolleu o pasado 30 de setembro, ás 19:30 horas, unha nova actividade do Programa Rosalía, unha iniciativa destinada a achegar formación, información e recursos ás mulleres do rural.
Baixo o título “Mulleres coñecendo os seus dereitos e recursos”, a sesión ofreceu un espazo de encontro e participación no que as asistentes puideron coñecer mellor os seus dereitos, resolver dúbidas e compartir experiencias, incidindo na importancia da información como ferramenta para gañar autonomía, seguridade e capacidade para tomar decisións.
A charla animada por Laura Seara Sobrado, diputada no Parlamento, abogada e consultora, realizou tamén un percorrido pola evolución dos dereitos das mulleres e polas diferentes etapas e conquistas alcanzadas no mundo, con especial atención ao caso de España e Galicia.
Durante o encontro, as participantes rememoraron as súas experiencias e recordos relacionados con momentos fundamentais como a legalización do divorcio e a despenalización do aborto, así como con avances lexislativos máis recentes, entre eles a Lei Orgánica 3/2007 para a igualdade efectiva de mulleres e homes, marco legal de referencia no Estado español para desenvolver o principio de igualdade.
O Programa Rosalía aborda así diferentes cuestións de interese para as mulleres, desde os dereitos e a igualdade ata a saúde mental, a sexualidade ou as reivindicacións sociais, apostando por achegar formación de calidade ao rural e facilitar o acceso a información e recursos.
A iniciativa contempla tamén, como peche do programa, unha visita á empresa Aceites Abril, especialmente dirixida ás mulleres que se atopan en proceso de busca de emprego, co obxectivo de achegalas ao tecido empresarial e ás oportunidades do ámbito laboral.
Na presentación e desenvolvemento do programa tamén se puxo en valor a importancia de levar formación e actividades de calidade ao rural, xerando espazos nos que as mulleres poidan informarse, formarse e compartir experiencias sen ter que desprazarse fóra do seu contorno.
Coñecer os dereitos, saber onde acudir e identificar os recursos dispoñibles constitúe unha ferramenta fundamental para avanzar cara a unha sociedade máis igualitaria e para reforzar a autonomía das mulleres, tamén no ámbito rural.
