A actividade “Vixías da Lagoa” organizada polo Proxecto de Animación Lectora da Furgoteca, Ourense Occidental, celebrouse o pasado 13 de maio, animada por Reme Cid, no marco da programación das Letras Galegas no Pai de Sandiás, cunha proposta educativa e lúdica centrada na riqueza natural da Lagoa de Antela e da súa contorna.
Coa chegada da primavera, son numerosas as aves que poden verse e escoitarse nesta zona, converténdose nun escenario perfecto para achegar o alumnado ao patrimonio natural do territorio.
Tomando como guía o libro “Antela, a memoria asolagada”, os nenos e nenas participaron en diferentes actividades nas que puideron descubrir os paxaros propios da comarca, así como identificar os seus sons máis característicos.
Para desenvolver a actividade empregáronse imaxes das distintas aves, que se foron amosando ao mesmo tempo que se reproducían os seus cantos, favorecendo así a súa identificación e aprendizaxe dun xeito dinámico e participativo.
